-
-
Papiamentu
Nazario Bernardus Martijn a nasé dia 2 di yüli 1958.
Nazario a kuminsá ku natashon na aña 1973 ora ku Monique Maria a fundá Bulado Swim Club na pir di Marie Pampoen. Nazario tabata un landadó aktivo te aña 1986.
Nazario tabata empleá na Deporte Sedreko for di 1985 te ku su fayesimentu e aña aki 2019.
Nazario a optené su diploma di swim teacher, swim coach i diving coach na Springfield College na U.S.A.
Diploma di swim teacher A i B na Kòrsou, tambe diploma di EHBO.
Diploma di swimming teacher na Instituto Nacional de Deporte na Venezuela.
Diploma curso ODEPA na Argentina.
Diploma FINA level 1 na Grecia.
Diploma FINA level 2 na St. Lucia.
Nazario a optené vários sertifikado den landamentu: coach level 1-4 ASCA, level 4 ASCA, level 5 ASCA, USRPT na Kansas City, USA, tambe Nazario a partisipá na First World Clinic Coaches na Hawai.
Nazario a fungí komo assistant head coach di Bulado Swim Club Curaçao, na Carifta Games na Barbados i Carifta Games na Jamaica.
Komo head coach Nazario a fungí di Bulado Swim Club, selekshon di Antias na Méhiko, selekshon di Antias CCCAN Games na Méhiko, Universade na Turkia, Universade na Bangkok, Universade na Rusia, Universade na Hong Kong, C.I.S.C. na Aruba, Weganan di Reino na Ulanda, YPA atletanan na Colombia I kompetenshanan di NACO.
Nazario tabata fundadó i head coach di Typhoon Swim Club.
-
Papiamentu
Gladwin a nasé dia 4 di Nov. 1944 na Kòrsou.
Gladwin a drenta den mundu di natashon na aña 1980 (siguiendo paso di su ruman mas hóben) hibando su yu landa den Buladó Swimming Club na pir na Maripampun.
Mirando su interes pa e deporte e head coach di Buladó a pidié pa yuda e landadónan mas hóben loke e a hasi tambe komo nan Coach pa 4 aña largu.
Na aña 1983 mirando ku buladó tabatin mester di representante den e kuerpo di ofisial e ku dos mayor mas a sigui e kurso pa ofisial loke no tabata fásil e tempu aya. E tempu ei ta hulandes nan tabata manda den mundu di natashon.
Denter den un korto tempu mirando su dedikashon e a subi i bira un di nos rèfri nan (Wes máksimo ). Gladwin su promé kompetensia internashonal tabata na aña 1986 den e kompetensia di Caribbean Island Swimming Championships (CISC) aki na Kòrsou.
Gladwin a traha den hopi kompetensia komo rèfri i wes di estilo na Aruba, Hulanda, Bonaire, Repúblika Dominikana, Puerto Rico, Trinidad & Tobego, Bahamas, Jamaica, Cuba, Venezuela, Colombia, México, Panama, Salvador. Guatemala, Argentina, i Perth Oustralia.
E kompetensia nan tabata Invitashonalnan, Caribbean Island Swimming Championships (CISC), Confederacion Centro Americana y del Caribe de Aficcionados a la Natacion (CCCAN), Centro Americana i del Caribe (CAC),Juegos Panamericano (PANAM) i na Perth Oustralia den e di 8 kampionato di mundu (FINA). (e promé kurasoleño na nivel mundial)
Di aña 1993 pa 2009 Gladwin tabata rèfri FINA. (Límite di edat 65 aña)
Di aña 1995 pa 2003 Gladwin a wòrdu apuntá komo miembro tékniko (TC) di CCCAN pa swimming.
Di aña 2011 pa 2013 Gladwin a fungi komo TC Openwater. Na 2014 CCCAN a bolbe eligí Gladwin pa un periodo di 5 aña (2014 pa 2019).
Gladwin riba su propio forsa a partisipá na 4 kongreso organisá pa FINA esta na 1996 Colorado Spring (Merka), 1998 Vancouver (Canada), 2002 Manchester (Inglatera) i 2004 Cancún (México). Gladwin a partisipá na e kongreso organisá pa USSA pa Puerto Rico den 2015.
Gladwin a partisipá na klínika organisá pa CCCAN swimming na Aruba, Repúblika Dominikana, Barbados i klínika nan di Openwater Cuba, Jamaica, Aruba, Bahamas i na Panama.
Gladwin ta instruktor di ofisialnan pa (NAZB / CZB) FAK na kual nan e ta dunando e ofisial nan nobo parti di e kurso básiko, un promedio di 25 pa aña aki na Kòrsou, pa Aruba promedio di 15 i pa Bonaire un 8.
Gladwin a formalisá e kuerpo di hurado di Aruba na 1995, i a guia nan promé i durante di CISC 2000 anual e ta na Aruba pa sigui nan desaroyo.
CISC 2002 na Kòrsou Ofisial nan tabata bou di su guia.
Gladwin a wòrdu nominá 7 bes (1991, 1993, 1998, 2003, 2004, 2007, i 2014) pa natashon pa wes di aña, di kual e a logra Sali 4 bes komo wes di aña di (CSF) FDOK na 2003, 2004, 2007, i 2014 .
Na 1995 Gladwin a wòrdu nominá e mehor Kordinadó (disiplina di natashon) pa Refineria Isla BV.
Na 2012 Gladwin a wòrdu nominá komo Baluarte di bario di Brievengat.
Na 2015 Gladwin a wòrdu nominá komo miembro Honorario di klup Buladó.
Awor aki Gladwin ta un di nos mehor rèfri na Kòrsou ku ta masha kerí den nos kuerpo di ofisial i e atletanan, e ta instruí i guia nos ofisialnan nobo. Bou di su guia awor FAK tin 4 rèfri FINA i 2 Wes di salida Fina Algu úniko pa Kòrsou.
Esaki tabata Sr. Gladwin L. de Lanoi
Algu tokante Gladwin su yu nan enkuanto natashon:
Darwin de Lanoi
Darwin tabata un di Buladó su mehor landadó riba e estilo di liber. (50 i 100 m)
Darwin a forma parti di hopi delegashon di Buladó i di NAZB den kompetensia nan internashonal, CISC, i CCCAN
Darwin a representá Refineria Isla vários bes den e kompetensianan organisá pa PEDEVESA
Ku hopi exito te e a haña e apodo di La flecha negra.
Un Landadó ku nunka ta bende barata.
Tabata Darwin A. J. de Lanoi
Sheldon de Lanoi
Sheldon tabata un di Buladó su mehor landadó riba e estilo di pechu. (50 i 100 m)
Sheldon a forma parti di hopi delegashon di Buladó i di NAZB den kompetensia nan internashonal, CISC, CCCAN C.A.C. i PANAM
Sheldon un pechista natural poseedor di record riba 50 i 100m pechu pa motibu di un aksidente kaminda e a kibra su man (8 luna afó) a disidí di kambia su estilo prinsipal di pechu pa e estilo liber i a logra un hazaña no usual pa un landadó di tin dos record mesun momentu riba 50 m liber e estilo mas velos i 50 m pechu ku ta e estilo mas pokopoko den landamentu.
Sheldon den aña 1992 a logra di bira e atleta hubenil maskulino di aña di CSF representando natashon den e sertámen aki.
Sheldon den e kompetensia di CCCAN 50 m liber na 1995 Guadalagara Mexico a logra medalia di plata pa enkaso 1 honderste di un sekònde landando den ban unu.
Sheldon a representá Refineria Isla vários bes den e kompetensianan organisá pa PEDEVESA
Den kual e a dominá den estilo pechu.
Esaki tabata algu di Sheldon G. de Lanoi
-
Papiamentu
Wilhelm (Wim) Keman (Polo Akwatiko)
Ofisial/Dirigente
a nasé di 22 di yanüari 1955
Wim a siguí su estudio na “Academie voor Lichamelijke Opvoeding” na Den Haag.
Na Koninklijke Luchtmacht Wim tabata hefe di ofisina di deporte na Vliegbasis Ypenburg.
Wim tabata dosente di landamentu na Haagse Academie voor Lichamelijke Opvoeding.
1979-2009 dosente Edukashon Físiko aki na Kòrsou i 2010–2013 direktòr general di Marnix College.
1973 – 1976 hungadó di ekipo di waterpolo Ulandés;
1974 i 1977 partisipante na e Kampeonato Europeo;
1973 i 1978 partisipante na e Kampeonato Mundial;
1979 – 2004 trainer/coach di waterpolo di organisashonnan di Kòrsou i diferente
selekshon Antiyano i di Kòrsou;
1979 – 1982 “diploma consul” di landamentu elementario di NAZB;
1980 – 1984 dosente di kurso di staf di CZB;
1986 – 2007 referee internashonal di waterpolo di FINA, partisipando komo referee
neutral di Antiyas na dos Weganan Olímpiko 1992 i 1996;
Seis kampeonato mundial di FINA1991, 1994, 1998, 2001, 2003 i 2005;
Un kopa mundial di FINA na 1997;
Sinku wega Pan Amérikano 1991, 1995, 1999, 2003 i 2007;
Seis wega Sentral Amérikano 1986, 1990, 1993, 1998, 2002 i 2006;
1993 – 2006 Dosente di FINA durante kursonan na Cuba, El Salvador, Brasil Canada,
Jamaica i Barbados;
1994 – 1998 miembro di direktiva di Association Internationale des Arbitres de Water
Polo.
2001 – 2005 miembro di direktiva di Association Internationale des Arbitres de Water
Polo.
2006 – 2010 miembro di komishon tékniko di waterpolo di CCCAN;
2007 – 2011 miembro di komishon tékniko di waterpolo di UANA;
2011 miembro di staf di coaching di NA waterpolo team na Dammam, Saoedi
Arabië;
2013 – 2017 Miembro di National Federations relation Committee di FINA;
2014 – 2018 Sekretario di di komishon tékniko di waterpolo di CCCAN;
2015 – 2019 miembro di komishon tékniko di waterpolo di UANA;
Distinshonnan di Wim ta:
Medayanan di plata i oro di KNZB pa respektivamente 75 i 125 “interlands” ku e ekipo nashonal Ulandés di waterpolo;
1991 Plaka Meritorio di CSF pa Wes di Aña;
2012 Ridder in de Orde van Oranje Nassau.
2016 SALON DI FAMA FDOK
-
Papiamentu
Eddy Solomon (Natashon)
Dirigente Atministrativo
a nasé dia 7 di yüli 1937.
Eddy ta konosí pa su dinamismo den deporte akuátiko.
Eddy a okupá diferente funshon den direktiva e.o.:
1980 – 2000 presidente di Sithoc zwemvereniging
1983 – 1987 presidente di Curaçaose Zwembond
1987 – 1988 miembro di N.A.Z.B.
1987 – 1989 miembro di direktiva di N.A.O.C.
1989 – 1994 vise presidente di CCCAN na nòmber di Karibe Ingles
2002 – 2006 presidente di Sithoc
2008 – 2010 presidente di Sithoc
Eddy a logra hopi pa e federashon di natashon.
1981 Sithoc a haña su mes statuto, i un trainer profeshonal,
1982 di dos trainer profeshonal pa Sithoc,
1984 selekshon nashonal di Kòrsou pa promé biaha riba podio di honor durante kampeonato Karibe anual di CZB,
1985 ta kuminsá ku lèsnan di landamentu di Sithoc mes,
1986 Kòrsou ta haña e honor pa organisá kampeonato Karibense,
1987 ta instalá komishon pa Sithoc tin su mes pisina,
1990 CZB ta organisá pa di dos biaha e kampeonato di CISC.
Despues ta bolbe reaktivá e komishon di pisina pa Sithoc. Ta kumpra un pisina prefabriká, pero despues di 2 aña ta kuminsá ku konstrukshon mes mes di e pisina. Un aña despues por a kuminsá hasi uso di e pisina di Sithoc ku ta haña nòmber di Sirena.
E resultadonan alkansá den natashon riba nivel nashonal ta mará na inisiativanan di Eddy riba nivel di klup kombiná ku su posishon di presidente di klup di natashon di Sithoc i Curaçaose Zwembond.
-
Nòmber : Enith Brigitha
Fecha Nasementu : 15 aprel 1955
Lugá : Kòrsou
Deporte : Natashon
A drenta salon di fama na 1992
Enith Brigitha na edat di 9 aña a kuminsá práktika e ramo di deporte landamentu. Na edat di 12 aña el a representá Kòrsou ku éksito den kompetensha di landamentu den Weganan di Reino, konkistando medaya di plata..
Ku su 15 aña Enith ta gana medaya di oro pa Kòrsou den Weganan di Reino di 1970.
Na 1971 Enith ta gana su promé medaya di oro pa Ulanda den kompetensha entre Ulanda i Alemania na Keulen-Alemania. Den klasifikashon final di e di XX Weganan Olímpiko di 1973 na Münich, Alemania Enith ta figura entre e 8 mihó landadónan femenino di mundu.
Enith a gana 2 medaya di plata i 2 di bròns pa Ulanda den e promé Kampeonato Mundial di landamentu di 1973 na Bélgrado-Checoslvakia. Den e XXI Weganan Olímpiko di 1976 na Montreal-Canada, Entih a kompetí pa Ulanda, ganando 2 medaya di bròns.
Distinshon risibí:
_ Deportista Femenino di aña 1973 nombrá pa Asosiashon di Kronistanan Deportivo di Ulanda.
_ Deportista Femenino di aña 1975 nombrá pa Asosiashon di kronistanan Deportivo di Ulanda.
_ Miembro honorario di Nederlandse Zwembond
_ Miembro honorario di klup di landamentu “Het IJ”
_ “Ridder Den Orden Di Oranje Nassau”
-
Nòmber: Juan (Bennie) Leito
Fecha Nasementu: 26 yüni 1937
Lugá: Kòrsou
Deporte: Natashon
Fayesé: q.e.p.d
A drenta salon di fama 1985
Bennie for di aña 1949 ora ku e zwembad di Rif a habri su portanan ofisialmente a traha einan. Segun e añanan a pasa Bennie a logra finalmente di bira Beheerder di e zwembad. Al mismo instante e a sigui komo instruktor. Aki e a sigui traha te ku den 1986 despues di 37 aña di trabou na Rif e a fayesé. Durante su karera Bennie ku su gran sentimentu i rèspèt pa su próhimo a gana rèspèt i rekonosementu di tur esnan ku a anda ku n’e i di hopi instanshanan riba nos Isla.
Na aña 1975 Bennie a wòrdu kondekorá ku:
* Eremedaille verbonden aan de Orde van Oranje-Nassau.
* Tambe a risibí un plakat di Mérito duna pa Departamentu di Desaroyo Públiko.
* Kultura i Deporte, pa motibu di su méritonan den e ramonan aki.
* Plakat Zwem-Pionier A Duna pa N.A.Z.B.
* Plakat di Stichting Rif-Zwembad komo prueba di dedikashon i trabou sobresaliente.
* 1984 Plakat di Mérito Pa labor i kontribushon ekstraordinario na bienestar di
R.K.S.V. SITHOC voetbal vereniging.
* 1988 C.S.F Award pa dedikashon komo dirigente deportivo
Bennie tabata un deportista all-a- round pero tambe self-made.
El a dediká hopi tempu na Boxeo ku pupilanan manera e.o. Galento Jr. Hopi aña tambe e a duna na futbòl kaminda e tabata entrenadó di , welpen, pupillen, aspirant i junior.
El a fungi tambe komo masahista di e ekipo di futbòl grandi SITHOC.
Bennie al lanta e klup di landamentu SITHOC for di apertura di Rif Zwembad, i a traha komo coach den tur e disiplinanan. E tabata masha orguyoso di su pupillonan. Pero semper e tabata papia di esnan ku a destaká manera Randy Wiel, Ruthley Isidora, Nilo Fernandes esakinan di natashon i di Sixto Djun-Djun Rovina di futbòl. Bennie Leito un gran deportista, un gran lider i un instruktor renombrá kende durante hinter su bida produktivo a dediká su mes na edukashon di nos hubentut. Ku gran amor pa nos muchanan semper e tabata presente pa yuda nan ku nan desaroyo tantu deportivo komo humano. Bennie tabata un hòmber ku prinsipionan fuerte. Disiplina tabata laga ku e tabata eksigí di grandi i chikí. Rèspèt pa un otro ser humano ta un di e balornan mas haltu ku e semper a purba di desaroyá den su alumnonan.
Su relashon honesto i strikto ku e tabatin ku hende tabata un di e karakterístikanan di su persona ku a demanda rèspèt di tur hende ku a anda ku n’e. Inkansa-bel ku dedikashon i amor e tabata yuda kada mucha ku kier a siña i dediká su mes na landamentu i e tabatin e kapasidat pa mira un talento for di tempran i train e adekuadamente. I asina for di 1949 ora ku e pisina di Rif a keda kla e fundeshi di klup SITHOC a keda forma. SITHOC ta Bennie i Bennie ta SITHOC. Ya for di tempran SITHOC tabatin diferente sekshon manera figuurzwemmen, waterpolo i lantamentu kompetitivo. Tur hende sa di su esfuersonan pa hasi nos klup esun di mas mihó na Kòrsou den tur ramo. I por konstatá ku e a logra e meta ei gloriosamente ku un tim den kual tur e talentonan ku e a deskubrí a haña formashon deportivo i awor ta representando Kòrsou i Antia den un forma ekselente. Bennie ta esun ku a forma e sekshon di veteranonan i e sekshon aki ta un ku a bira masha yega na dje i visa versá.
Manera tur nos miembronan sa SITHOC awor aki ta konsistí ademas di un sekshon di veteranonan di un sekshon di training, sekshon di pre-top, sekshon di tòp, sekshon di waterballet (sunchro), sekshon di waterpolo hubenil i senior i un sekshon di instrukshon (zwemles). Den su karera komo “beheerder” di Rifzwembad Bennie a konfrontá difikultatnan serio ku e pisina. Pipanan ku frekuentemente tabata frusa i kibra, pòmpnan ku no kier a traha, sefta den laman ku mester a wòrdu kambia etc etc. Pero Bennie semper a logra ku su personalidat persistente pa haña un solushon pa e problemanan aki. Sea ku òf sin rekursonan finansiero pero semper ku hopi sosten i forsa di su amigunan den tur sekshon di nos komunidat e a logra di mantené e pisina di Rif operashonal. Tabata duele ku e último añanan Rif a sigui bai atras apesar di su luchanan. Den 1983 su speransa a lanta ora ku un rapòrt di un komishon a resultá den un reservashon di 100.000 florin di Banko Maduro pa renová e pisina. Pero lástimamente no a keda kla.
I p’esei nos kier a hasi un yamada na tur instansianan konserní pa hasi tur esfuerso posibel pa realisá e soño di nos gran edukador, luchadó Bennie pa e fasilidat aki bira un digno di nos komunidat, digno di un persona manera Bennie Leito ku semper a mira e pisina komo un nesesidat krusial pa formashon di nos hubentut.
Tambe no ta kere ku e Rifzwembad aki lo mester bira e momento pa rekordá e gran persona aki. I nos ta proponé pa bai yama e fasilidat aki Pisina Memoria Bennie Leito.
Laga nos sigui bo ehèmpel Bennie komo lider , edukador, deportista i ser humano.
