Johnny Hellmund Papiamentu
Johnny Hellmund (Biyar)
Deportista
a nasé dia 13 di febrüari 1946 na Korsou
Johnny Hellmund, konosí den e mundu di biyar di Antia i Aruba komo “The Legend”, a siña hunga biyar na edat di 7 pa 8 aña riba e mesa di biyar (karambola) i na edat di 15 pa 16 aña e a kuminsá hunga biyar (pool), kaminda mester hinka mas tantu bola posibel den e seis burakunan di e mesa, ganando ya kaba di hopi bon tiradó adulto den e bario di Pietermaai.
Na 1964 Johnny a bai studia na Hulanda na e siudat Groningen i durante su estudio a sali kampeon di karambola di e District “Het Noorden” (Groningen, Drente, Friesland) na vários okashon den e diferente disiplinanan di karambola, manera “Libre, Tres-banda, Kader 38-2 i Un- banda” den e periodo di 1967 pa 1973.
Na ougùstùs 1973 Johnny ta regresá Korsou despues di terminá su estudio pa hurista i mesora ta risibí invitashon di e presidente di “Curacaose Biljart Bond” di e tempu ey, Sr. Sansio Schob q.e.p.d., kende tabata na altura di Johnny su éksitonan na Hulanda, pa partisipá den e diferente torneonan i kampeonatonan di karambola. Mayoria di e weganan a tuma lugá na e klupnan di JPF i Asiento.
Johnny a gana praktikamente tur evento di karambola ku a wòrdu organisá den e periodo di 1973 pa 1985. Despues di 1985 e popularidat di karambola a kai hopi mes i ta e disiplina di pool (pocket-billiards) a bira sumamente popular, tantu na Korsou, Aruba, Boneiru i St. Maarten.
Den e periodo di 1985 pa 2013 Johnny a dominá e deporte di pool na Antia Hulandes den e diferente disiplinanan, manera bola-8, bola-9, bola-10 i straight-pool, akumulando mas di 70 título individual sin konta esnan ku e a gana ku su ekipo “The Biesheuvel Friends”den e weganan di ekipo.
Johnny ta e promé yu di Korsou ku a partisipá den un kampeonato mundial di biyar. Esaki tabata na 1993 na Alemania i despues e a partisipá na 1994 na Chicago, na 1995 na Taiwan/Japon, na 1996 na Suesia i finalmente na 1998 un biaha mas na Taiwan. Despues Johnny a representá Korsou for di 2000 te ku 2013 kasi tur aña den e respektivo kampeonatonan Panamericano, entre otro na Venezuela (2x), Colombia (2x), Aruba (2x), Guatemala, Korsou, Panama, i por ultimo na Boneiru na 2013 kaminda e Presidente di e Federashon Panamericano a sorprendé Johnny na momento di e klousura i entrega di premio ku un homenage speshal pa e despedida di Johnny su partisipashon aktivo komo hungadó na e kampeonatonan aki. Na dos okashon Johnny a terminá na di 9 lugá for di un total di 64 partisipante den e diferente kampeonatonan Panamericano.
Johnny a wòrdu nominá vários bes pa deportista di aña di Korsou i a gana e título aki di deportista maskulino di aña na 2002.
Fuera di e kampeonatonan Mundial i Panamericano ofisial Johnny a representá Korsou na hopi otro torneonan internashonal ku a tuma lugá na diferente okashon na tantu Puerto Rico, Santo Domingo, Venezuela, Guadeloupe, Aruba i Boneiru.
Apart for di biyar Johnny tabata aktivamente envolví tambe ku basta éksito den baseball komo coach i interim-manager di BBC Wildcats den añanan setenta/ochenta i Johnny a traha tambe den diferente komishon pa tantu e deportenan di baseball i futbol.
Michael Anthony Carl Arvelo Papiamentu Nòmber : Michael Anthony Carl Arvelo Fecha di nansementu : Kòrsou, 6 di novèmber 1957 Michael su pashon ta biyar maske el a praktiká ahedres den Capablanca, ténis di mesa den ekipo di St. Thomas College i natashon den ekipo di Sithoc. Michael a siña hunga biyar tantu pool i karambola serka dfm Boeiboei St. Jago. 18 di desèmber 1988 Michael huntu ku Freddy Wanga ta pone e fundeshi loke awe ta Federashon Biyar Kòrsou, despues a bin komprendé ku nan a rebibá e federashon ku tabata fundá for di 1955. 1989 – 2016 pa 27 aña largu okupando e puesto di di direktor deportivo i relashonista públiko, tambe na tres okashon presidente. 1991 organisadó di promé torneo individual Best of the best ku premio di mil florin; ta yuda lanta federashon na Aruba, Boneiru i St. Maarten 1993 introdukshon di sistema di liga 1994 liga ta bira parti di ofishal di federashon liga bola 9; kampeonato mundial na Chicago komo timekeeper: instruktor sertifiká 1995 introdukshon di sistema di ranking 2000 – 2016 partisipá na kampeonato Pan Amerikano pa 14 aña 2004 organisá kampeonato Pan Amerikano bola 9 na Kòrsou 2010 logra rekonosimentu i afiliashon na organisashonnan mundial 2017 dirigí arbitrahe na kampeonato Pan Amerikano na Argentina i Nicaragua; duna kurso di árbitro na Nicaragua; entrenadó di ekipo nashonal femenino na Nicaragua 2018 dirigí arbitrahe na kampeonato Pan Amerikano na Argentina; duna kurso di árbitro na Argentina Rekonosimentunan: 2003 St. Maarten pool & billiard players federation 2007 Federación Domincana de clubes sociales, culturales i deportivos 2010 dirigente atministrativo di FDOK 2017 wes di aña di FDOK 2018 instructor arbitros y dirigente technico y arbitrahe, Argentine