Papiamentu
Nòmber: Efigenio Adriano Braafhart mihó konosí komo PengPeng
Fecha nasementu: 8 sèptèmber 1949
Lugá: Curaçao.
Mi a kuminsá hasi yudo na 1974 na Sportschool Braaf na Orionweg.
Na 1975, mi a kuminsá duna lès na muchanan chikitu pa Sr. Braaf.
E mesun aña den luna di òktober durante di kampionato di Kòrsou mi a kibra mi èlebog.
Mi a keda un aña inaktivo komo kompetidor pero a keda duna lès.
Na 1976, mi a bolbe kompetí den kategoria di middle-weight.
Mi a bira kampion di Kòrsou i Antia te ku 1980 e aña ku mi a retirá.
Na 1977, mi a haña mi promé dan ku ta faha pretu (Sho-Dan).
RÈFRI
Mi a sigui duna lès despues di sportschool Braaf, na Asiento i mi propio skol di yudo Samurai.
1982, mi a kuminsá rèfri na Kòrsou.
E mesun aña mi a pasa eksamen pa mi di dos dan (Ni-Dan).
1986, sr. Francisco Mundo, un rèfri Internashonal di Venezuela a bin yuda nos ku dunamentu di lès di yudo.
E tabata sorprendí di e manera ku mi tabata rèfri.
For di 1987, mi a wòrdu invitá dor di sr. Mundo pa rèfri kampionatonan di Karibe na Venezuela.
Durante e aña aki mi a haña mi di tres dan (San-Dan).
Na 1992, Sr. Carlos Catalana Callega, direktor di arbitrahe di Federashon Internashonal di Judo (IJF) a wak mi ta rèfri na Venezuela.
El’a puntrami di unda mi ta, i ki nivel di rèfri mi tin.
Mi a kontest’é: di Kòrsou i mi no tin nivel.
El’a bisami IJF tin tres nivel: nivel “C” nivel “B” i nivel “A”.
El’a disidí ku e ta bini Kòrsou despues di Venezuela pa pasa ami so eksamen di rèfri Continental. (IJF B).
Ku otro palabra mi a bula nivel “C” i a hasimi di kuater dan (Yo-Dan).
Mi a bira e promé rèfri Continental di Kòrsou i Antia.
For di e momentu ei mi a rèfri tur pais Panamerikano.
Tur weganan di: Caribe, Sur-, Sentro- i Norteamerika.
Na 1997, mi a kuminsá duna lès na Sentro di Bario Janwe i Klup di Shell, awe Sentro di Rekreativo Suffisant, te ku dia di awe.
Na 1998, mi a wòrdu postulá pa pasa eksamen di rèfri nivel “A” na Repúblika Dominikana.
Nan a lagami rèfri, solamente dos pelea.
Mi a bira rèfri Internashonal “A” i haña mi di sinku dan (Go-Dan).
Siendo rèfri Internashonal mi a rèfri diferente kampionato mundial, den tur sinku kontinente.
Por ehèmpel: Fransia, Alemania, Tailandia, Hulanda, Tunesia ets.
Mi a bira e promé referié Internashonal i mundial di Kòrsou i Antia i a wòrdu konsiderá un di e mehor rèfri Panamerikano.
LOKAL
For di aña 1977, mi a drenta direktiva di Judo Associatie Curaçao (JUASCU) komo komisario.
Na aña 1987 mi drenta den direktiva di Nederlandse Antillianse Judo Federatie (NAJUFE) komo segundo tesorero.
For di aña 1998, mi a fungi komo Presidente, Tesorero, Sekretario, Direktor di arbitrahe i Deportivo, Coach i trainer di JUASCU i NAJUFE te aña 2000.
Durante di e tempu ei ta mi kasa i mi dos yunan tabata organisá kampionato di yudo.
Na aña 2000, a eligí un direktiva nobo i mi a keda tesorero, coach i trainer te ku dia di awe.
Na 2010, JUASCU I NAJUFE a bira Federashon Yudo Kòrsou. (FYK)
Durante di 2010, mi a haña mi di seis dan (Roku-Dan).
Mi klupnan semper a sali na promé lugá den tur kampionato tantu di Kòrsou komo habri di JUASCU, awe konosí komo Federashon Yudo Kòrsou.
Mi a produsí tambe, kampionnan Internashonal.
Nan a bira kampion na: Aruba, Bonaire, st. Maarten, Sto. Domingo, El Salvador, Venezuela i Merka.
Tur bou di mi guia.
Award di USA yudo: 4/6/2008
Baluarte di e deporte di yudo na Kòrsou: 3/11/2007
Wes di aña CSF: 2008 i 2009.
Plaka di mérito di SRS: 9/3/2013
Baluarte di bario di Janwe: 2/6/2016.
Plaka di mérito di Kas di Kultura: 2/6/2016.
Baluarte di Banda Ariba: 3/11/2016.
INTERNASHONAL
Mi a pasa eksamen di nivel “basiko”, nivel “1” i “2” di deporte general na Venezuela, aña 1988, 1989 i 1990, na Puerto Rico.
For di 1998, mi a wòrdu nombra komo tesorero di Konfederashon Yudo di Karibe.(CJC)
Nunka mi no a postulá mi mes pa ningun puesto den direktiva.
Aki tambe mi a okupá tur puesto den direktiva.
Awe mi ta sekretario general di Konfederashon Yudo di Karibe, pa reorganisá yudo den Karibe.
Na aña 2009, mi a stòp di ta rèfri aktivo riba mat.
Mi a wòrdu nombra komo komishonado di arbitrahe di Karibe pa Panamerican Judo Confederacion.
Na mesun momento mi a bira traduktor ofisial di Ingles pa Spañó i vice vèrsá, durante di klínika i kongreso di PJC.
Na 2015, mi a bira Direktor i komishonado di arbitrahe di Suramérika.
Na 2015, mi a haña mi di shete dan di yudo (Hichi-Dan).
Ku esaki mi a bira e promé yudoka ku faha mas haltu na pais Kòrsou i islanan di Caribe hulandes.
Mi a i ta dirigí kampionatonan Pan-Amerikano mi so.
Mi ta eksaminá i evaluá rèfrinan di nivel “C”, “B” i “A”.
Mi ta duna klínika di arbitrahe tantu práktika komo teorétiko.
Mi a logra klasifiká un atleta pa Weganan Olímpiko di London 2012.
Pa Weganan Olímpiko di Rio 2016, mi tabata tin un atleta klasifiká ku “Continetal Couta”, pero el’a wòrdu kita.
Mi a logra na 2016, ku nos ta wòrdu konsiderá komo”Full Member” di nos Federashon Internashonal Yudo (IJF).