Papiamentu
Nieuwindt College
Radulphus College HBS-A 1962
Inter American University,
San German, Puerto Rico
Summer 1969
• Bachelor of Arts, Economics 1967
• Masters Business Administration, Majors:Finance and Marketing 1969
Experience
El Globo – Delvalle Hermanos 1969 – 1973
Curom Broadcasting Inc CEO 1974 – te awe
Ela nase riba un djasabra, dia 5 ougùstùs 1944. Yu di Teofilo Segundo Cuales, Empresario, Violinista; i di Adela Francisca Cuales-Pardo, Pianista, Atministradora i Ama di Kas.
E ta di tres di e famia di ocho yu. Nan a batis’é na Misa di Santa Famia, ku e nòmber Orlando Felipe Cuales.
Si b’a drenta nan kas anto nota presensia konstante di Deporte, Muzik i Polítika, lo b’a konkluí ku ta diesun yu tabatin. Pero ripará ku a menshoná Deporte promé ku e dos otronan.
Pai tabata Tenista, Presidente N.A.B.L.T (Ned.Ant.Bond Lawn Tennis) i Sekretario di NABLO (Ned.Ant.Bond Lichamelijke Oefening, Organo máksimo di tur deporte di henter pais; e precursor di NAOC i tur otro organisashon supervisor di nos pais, inkluyendo FDOK.
Den Piscaderaweg 3 Deporte tabata Pan di kada Dia!.
Tènis tabata e idioma deportivo di famia. Roberto, Gonzalo, Sonia i Eva a hunga hopi tempu i ku éksito. Orlando a bira kampion di Dòbel Junior tres bia. Promé bia huntu ku Edsel Evertsz, di dos bia ku Boy Berenos, I di trs bia ku Richard Trappenberg. I na Puert Rico ela representa su Universidat den e Varsity Team di Tenis.
Curom pa hopi aña tabata famoso pa su transmishonnan di prinsipalmente futbòl, den bos di e Dekano Komentarista Deportivo di tur tempu, Don Hector A. Rosario.
Na desèmber 1974, Orlando su promé aña na Curom, nan a transmití algun wega di playoff di Softball den Stadion di Rif.
Pero e gran breakthrough a bin na 1975. Na mart di e aña ei, Orlando a yama Don Aco Henriquez pidié pèrmit pa transmití e weganan di e temporada nobo di beisbòl. Aco su kontesta? “Di bo henter e kampionato ta. Dal bai mesora.”
Curom a presentá i transmití foi dje promé wega di kampionato 1975. Sta Rosa Indians kontra Blue Hawks. Yubi Mercelina i Alfred Stakleborough a kombiná riba montíkulo pa dominá Clarence Thomas i Blue Hawks. Sta Rosa a gana 8 pa 4.
No tabatin ni 60 hende den tribuna.
Dos siman despues Stadion a kumisá yena. Promé ku e promé luna a kaba, mester a bai para den rei foi 12or di mèrdia pa sigurá bo karchi pa tur wega importante.
Den un drumi lanta beisbòl su popularidat a subi enormemente.
Kòrsou a siña konosé i gosa ku
• Swing den Bashí,
• Situashon Pèrèmpèmpè,
• Hanchi bai Pèrdè,
• El a Keda Pegá den Waya,
• Atábo den Chokompé
• Tiru pa Segunda Morto-Kachó, iiiiii
• Tiru pa Primera Seeeeiiiif.
I no esnan den stadion so. Señoranan di tur parti di sosiedat tabata reuní den grupito pa gosa di pelota sin ku nesesariamente nan tabata sa kiko ta un shortstop, ni toke di sakrifisio, ni infield fly!
I nan a sera konosí “radialmente” ku Wily Pieters-Mr Beisbòl, Poder Jozefa, Orlando-WayaLargu Nicolina, Rafi Stotzuiger, Fichi-Saad Flemming, Elvis-Piská Martis, “Panamerikano” Moesquit, Kabouter Gutierrez, “Lijn Zeventien” Balentin, “meneer Pan” Libiana i Last but never Least, “Beans” Elhage! Orlando a inventa diferente di e nòmbernan ei. No tur! Otronan ta peloteronan a konté. Pero ta transmishonnan di Curom a hasinan tur konosí.
I naturalmente Tabatin I ketubai tin e otro esenario. Esun internashonal.
Na 1976, George Steinbrenner, doño di New York Yankees, a bishitá Kòrsou pa su otro negoshi, esun di ship building. Orlando a tribi puntré “What about broadcasting a Major League Baseball Series Live in Papiamento?” George di “YES” mesora. Tres siman despues ata Gonzalo, Eithel i Orlando ta transmití un weekend series bibu for di Yankee Stadium. Anto New York Yankees vs Boston Red Sox! E homerun desisivo di Chris Chambliss ta inolvidabel.
Djei a sigui Dodgers na Cincinnati su Big Red Machine, Fernando Valenzuela su 2 homerunnan na Atlanta, Reggy Jackson su regreso den Yankee Stadium, Hensley su hitnan den Sky Dome di Toronto i hopi hopi hopi mas.
• Plus dos bia masha importante: Hensley, ku nos a kana kune henter su pasashi den Liga Menor, te ela subi, dal su promé hit, i Eithel a mande live foi Yankee Stadium,
• i dia Andrew a firma den Stadion di Atlanta. Orlando a entrevist’e tras di homeplate, I kara serio ela priminti “Otro aña mi takiden!” I ela kumpli tambe.
I CentroAmericana na Cuba, Haarlemse Honkbalweek, Panamericano na Caracas, Centro Americana i Josefaso na Santo Domingo i e promé i úniko no-hit-no-run den World Baseball Classic: Shai Martis na San Juan Puerto Rico.
Loke a kumisá na 1974 ku Orlando, Ernest i Daniel, rápidamente a añadí Gonzalo i Chicho komo komentarista i despues tremendo narador; Gonzalo espesialmente a destaká den Little League; i seguidamente Rafi i Cedric.
Despues di kuarentitres aña i mas ku dosmilsinkushen transmishon, nos ta kla pa e próksimo Playball!!!
Nòmber: Hector Asuncion Rosario
Fecha Nasementu: 25 mei 1925
Lugá: Kòrsou
Deporte: Kronista Deportivo
Fayesé: 10 ougùstùs 2008
A drenta salon di fama na 1985
Hector Asuncion Rosario, a kuminsá den krónika deportivo den kuminsamentu di añanan ‘ 50 na La Prensa, di kual diario despues e tabata enkargá ku redakshon. A introdusí elekshon di 5 deportista anual, komo promé distinshon pa deportistanan tur aña.
De añanan 50 el a kuminsá tambe ku e promé programa deportivo semanal na radio, na CUROM (e tempu ei den Fòrti riba Rif).
Pa e emisora ei el a kuminsá tambe ku e promé transmishonnan di futbòl regular na Papiamentu. El a keda den narrashon di futbòl di e tempu ei te ku aña 1980. Tambe e ta narador di Boxeo.
El a kuminsá i a hib’é pa mas ku dies aña e promé programa semanal deportivo na Televishon (patrosiná pa Shell).
Na televishon el a kontinuá ku elekshon di e 5 mihó deportistanan di aña. El a skirbi pa un periodo breve pa un suplemento deportivo di e diario AMIGOE y tambe un kolumna den NOBO. E tabata na momento dado e promé ku tabata komentá deporte na tur tres media, esta korant, radio i televishon.
Na 1983 a kuminsá ku e promé programa deportivo diario na Televishon.
Hector Rosario den su hubentut ta práktika futbòl, atletismo i kòrfbal, i tabata forma parti di e ekipo di Independiente ku na 1941 a bira kampeon di Futbòl si Korsou. Sr. Rosario tabata pa vários aña presidente di e klup kampeon di beisbòl dje tempu ei, “Lucky Strike”, i tabata den direktiva di Federashon di Beisbòl e tempu ei presidí pa e Kònsùl Dominicano aki, Don Andres Julio Espinal. Hector Rosario a bira promé kronista deportivo pa ser inkluí den e Galeria di Salon di Fama di C.S.F.